Türkmenistan häzirki döwürde halkara ulag-üstaşyr ulgamyndaky ornuny pugtalandyrmak, dünýäniň esasy ykdysady merkezleri bilen netijeli aragatnaşyklary ösdürmek ugrunda giň möçberli işleri durmuşa geçirýär. Ýurdumyzda döwrebap ulag düzümini döretmek we halkara geçelgeleriň mümkinçiliklerini artdyrmak döwlet syýasatynyň möhüm ugurlarynyň biri bolup durýar.

Häzirki wagtda Türkmenistanyň çäginden iki sany möhüm halkara ulag geçelgesi geçýär. Gündogar — Günbatar ugry Hytaýy, Merkezi Aziýa döwletlerini, Kawkazy we Ýewropa ýurtlaryny özara baglanyşdyrýan möhüm ulag halkasy hökmünde çykyş edýär. Demirgazyk — Günorta ugry bolsa Pars aýlagynyň döwletlerine, Günorta Aziýa we dünýä bazarlaryna çykmak üçin amatly mümkinçilikleri döredýär.

Ýurdumyz awtomobil, demir ýol, howa we deňiz ulag ulgamlaryny ösdürmek hem-de döwrebaplaşdyrmak boýunça iri taslamalary yzygiderli durmuşa geçirýär. Bu ugurda Türkmenbaşy Halkara deňiz porty aýratyn ähmiýete eýedir. Hazaryň kenarynda ýerleşýän bu döwrebap ulag merkezi Ýewraziýa giňişliginde söwda-haryt dolanyşygyny ösdürmäge, halkara gatnawlaryň netijeliligini ýokarlandyrmaga uly goşant goşýar.

Türkmenbaşy Halkara deňiz porty Hazar deňziniň beýleki kenarýaka döwletleriniň portlary bilen yzygiderli aragatnaşyk saklap, sebitiň ulag mümkinçiliklerini birleşdirýän möhüm merkez hökmünde çykyş edýär. Ol diňe bir häzirki zaman infrastruktura desgasy bolman, eýsem Türkmenistanyň halkara ulag başlangyçlaryny durmuşa geçirmeginde möhüm orun eýeleýän strategik merkezleriň biridir.

Ýurdumyzda demir we howa ýollary arkaly ýük daşamalaryň tizligini hem-de ygtybarlylygyny ýokarlandyrmak boýunça hem netijeli işler alnyp barylýar. Bu çäreler Türkmenistanyň halkara ulag geçelgelerindäki ornuny has-da berkitmäge we täze üstaşyr mümkinçiliklerini döretmäge hyzmat edýär.

Awtomobil ýollaryny ösdürmek hem ulag ulgamynyň möhüm ugurlarynyň biri bolup durýar. Bu babatda umumy uzynlygy 600 kilometre barabar bolan Aşgabat — Türkmenabat ýokary tizlikli awtomobil ýolunyň gurluşygy aýratyn ähmiýetlidir. Bu taslama ýurdumyzyň ulag geçirijilik kuwwatyny artdyrmaga, döwrebap we ýokary netijeli ulag geçelgesini döretmäge mümkinçilik berdi.

Şeýle hem umumy uzynlygy 252 kilometre deň bolan Türkmenbaşy — Garabogaz — Gazagystan serhedi awtomobil ýolunyň gurluşygy Demirgazyk ulag ugruny ösdürmekde möhüm ädimleriň biridir. Täze ýol Ýewraziýa giňişliginde goşmaça durnukly ulag ugrunyň kemala gelmegine, üstaşyr akymlaryň artmagyna we sebitara ykdysady gatnaşyklaryň giňelmegine ýardam eder.

Türkmenistanda serhetýaka gümrük nokatlaryny döwrebaplaşdyrmak boýunça alnyp barylýan işler hem ýurduň ulag-üstaşyr mümkinçilikleriniň artmagyna oňyn täsir edýär. Häzirki zaman tehnologiýalary bilen üpjün edilen gümrük nokatlarynda ýükleriň geçirilmegi has çalt we amatly amala aşyrylýar.

Sanly ulgamlaryň ornaşdyrylmagy bolsa gümrük işleriniň halkara ölçeglerine laýyklykda alnyp barylmagyna şert döredýär. Bu işler Türkmenistanyň dünýä ulag ulgamynda ygtybarly hyzmatdaş hökmünde ornuny has-da pugtalandyrýandygyny görkezýär.