Türkmenistanyň Prezidenti hormatly Serdar Berdimuhamedowyň gatnaşmagynda 10-njy oktýabrda Saglygy goraýyş we derman senagaty işgärleriniň güni mynasybetli Halkara Onkologiýa ylmy-kliniki merkeziniň, Stomatologiýa merkeziniň hem-de Halkara Pediatriýa merkeziniň dabaraly açylyşy boldy. Bu ajaýyp toý sowgatlary milli saglygy goraýyş ulgamynyň maddy-enjamlaýyn binýadyny barha berkitmäge we ilata hödürlenilýän lukmançylyk hyzmatlarynyň hilini dünýä standartlaryna laýyk getirmäge uly goşant goşar. Bu barada Türkmenistanyň Döwlet habarlar agentligi habar berdi.

Berkarar döwletiň täze eýýamynyň Galkynyşy döwründe raýatlaryň saglygyny goramak we olaryň bagtyýar, abadan durmuşda ýaşamagy üçin amatly şartlary döretmek döwlet syýasatynyň ilkinji derejeli ugurlarynyň biri bolup durýar. Şol sebäpli hem ýurdumyzyň lukmançylyk edaralarynyň mümkinçilikleri yzygiderli giňeldilip, olara öňdebaryjy tehnologiýalar we innowasion çemeleşmeler işjeň ornaşdyrylýar.

Türkmen halkynyň Milli Lideri, Türkmenistanyň Halk Maslahatynyň Başlygy tarapyndan işlenip taýýarlanylan «Saglyk» döwlet maksatnamasynyň çäklerinde Aşgabat şäherinde we welaýatlarda döwrebap bejeriş-anyklaýyş merkezleri, köpugurly hassahanalar ham-de şypahanalar yzygiderli gurulýar. Şonuň bilen birlikde, Ýokary derejeli täze 400 orunlyk «Arçman» şypahanasynyň binalar toplumynyň açylmagy hem saglygy goraýyş ulgamynda gazanylýan üstünlikleriň aýdyň subutnamasydyr.

Türkmenistanda durmuşa geçirilýän giň gerimli özgertmeler we gurlup ulanmaga berilýän täze saglygy goraýyş binalary halkara bileleşigi tarapyndan hem ýokary baha eýe bolýar. Bina edilýän döwrebap lukmançylyk merkezleriniň halkara guramalarynyň ýörite güwänamalaryna hem-de şahadatnamalaryna mynasyp bolmagy ýurdumyzyň bu ugurdaky gazanan sepgitleriniň bütin dünýäde ykrar edilýändigini görkezýär.