Türkmenistanyň hormatly Prezidenti Serdar Berdimuhamedowyň gol çeken Kararyna laýyklykda, Awtomobil ýollary ministrligine umumy uzynlygy 546 kilometr bolan Aşgabat — Daşoguz awtomobil ýolunyň hem-de onuň ugrunda uzynlygy 812 metr bolan täze awtomobil köprüsiniň taslamasyny düzmek we olary gurmak boýunça şertnamalary baglaşmaga ygtyýar berildi. Bu barada Türkmenistanyň Döwlet habarlar agentligi habar berdi.

Mundan başga-da, resminamada bu ýoluň ugrundaky bar bolan köprüleri düýpli döwrebaplaşdyrmak göz öňünde tutulýar. Bu taslama «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyny» amala aşyrmagyň çäklerinde amala aşyrylar.

Ýurtda ýol gurluşygy boýunça bellenilen maksatnamalaryň çäklerinde eýýäm birnäçe iri taslamalar üstünlikli durmuşa geçirildi. Şolaryň hatarynda halkara ülňülerine doly laýyk gelýän Aşgabat — Türkmenabat awtoýolunyň tapgyrlaýyn işe girizilmegini, welaýatlarda we paýtagtymyzda onlarça döwrebap awtomobil köprüleriniň, ýol çatryklarynyň hem-de täze köçe-ýol ulgamlarynyň gurlup ulanmaga berilmegini görkezmek bolar.

Gurulýan we eýýäm ulanmaga berlen bu desgalar ýurdumyzyň ulag-üstaşyr infrastrukturasyny kämilleşdirmekde möhüm orun eýeleýär. Ýokary hilli ýol infrastrukturasynyň ösdürilmegi diňe bir ýurt içindäki ýük we ýolagçy gatnawlarynyň tizligini hem-de howpsuzlygyny üpjün etmän, eýsem Türkmenistanyň halkara ulag geçelgelerindäki strategik ornuny berkitmäge we sebitara ykdysady hyzmatdaşlygy täze basgançaga çykarmaga uly şert döredýär.