14.12.2024
13-nji dekabrda Türkmenistanyň DIM-de daşary işler ministri Raşid Meredow bilen Halkara Bitaraplyk güni mynasybetli guralýan baýramçylyk dabaralaryna gatnaşmak üçin Aşgabat şäherine gelen Halkara Gyzyl Haç Komitetiniň (HGHK) Merkezi Aziýadaky sebitleýin wekilhanasynyň ýolbaşçysy Bilýana Miloşewiçiň arasynda duşuşyk geçirildi.
Türkmenistanyň DIM-niň resmi saýtynda berilýän habara görä, duşuşygyň barşynda HGHK-nyň sebitiň çäklerinde, hususan-da, Türkmenistanda häzirki wagtda alyp barýan işlerine gysgaça syn berildi. Halkara ynsanperwer hukugyny ilerletmek we milli kanunçylyga ornaşdyrmak, şeýle hem Türkmenistanyň Gyzyl Ýarymaý Milli jemgyýeti bilen alnyp barylýan hyzmatdaşlyk babatdaky meseleler ara alnyp maslahatlaşyldy.
Taraplar HGHK-nyň milli hyzmatdaşlarynyň halkara ynsanperwer hukugy ugrundaky mümkinçiliklerini pugtalandyrmaga we artdyrmaga gönükdirilen çäreleriniň ähmiýetini nygtadylar.
Mundan başga-da, duşuşykda Türkmenistanyň Hökümeti bilen HGHK-nyň arasyndaky hyzmatdaşlygyň 2025-nji ýyl üçin meýilnamalaryna seredildi. Hususan-da, HGHK tarapyndan Türkmenistanyň ugurdaş ýokary okuw mekdepleri üçin halkara ynsanperwerlik hukugy boýunça okuw kurslarynyň we sapaklarynyň geçirilmeginiň mümkinçilikleri maslahatlaşyldy diýlip, habarda bellenilýär.