Türkmenistan ýokary öndürijilikli hasaplamalar we kriptowalýuta ulgamyndaky taslamalar üçin ulanylyp bilinjek häzirki zaman maglumatlary gaýtadan işleýiş merkezlerini döretmek meselesini daşary ýurt kompaniýalary bilen ara alyp maslahatlaşýar. Bu barada Türkmenistanyň energetika ministri Annageldi Saparow duşenbe güni Aşgabatda geçirilen “Ak şäher Aşgabat” halkara maslahatynda mälim etdi.

Ministriň aýtmagyna görä, şeýle taslamalar ýurda öndürilýän elektrik energiýasynyň artykmaç möçberini netijeli peýdalanmaga we sanly ykdysadyýeti ösdürmäge mümkinçilik berer.

Annageldi Saparow 2026-njy ýylyň 1-nji ýanwaryndan başlap Türkmenistanda “Wirtual aktiwler hakynda” Kanunyň güýje girendigini belledi. Bu resminama kriptobiržalaryň işlemegi we kriptowalýuta maýninginiň kanunlaşdyrylmagy üçin hukuk binýadyny döretdi.

Pudagyň wekili Türkmenistanyň energetika, sanly infrastruktura we häzirki zaman tehnologiýalary ugurlarynda halkara kompaniýalary bilen hyzmatdaşlyga taýýardygyny nygtady.

Ministr “ýaşyl” energetikanyň ösdürilmeginiň ýurduň ileri tutulýan ugurlarynyň biri bolmagynda galýandygyny hem habar berdi. Aziýa ösüş bankynyň goldawy bilen Türkmenistanda geljekde ýel elektrik stansiýalaryny gurmak üçin meýdançalary kesgitlemek maksady bilen ýel kuwwatyny öwrenmek boýunça barlaglar dowam etdirilýär.

Источник: business.com.tm